مساديركردفانية5

ELMOIZ ELHAJ ELNOUR الأربعاء سبتمبر 07, 2011 9:12 am

الكنـز
شعر/ محمد زين العابدين أبو جديري

سنين وسنين ......
نفتش لسه فيهو الكنز وما لاقين
تصوروا إنو من تسعين !!
حكاية الكنز بينْ بينْ بينْ
كل القالو حتى الحين
إنو الكنز موجود في التراب والطين
وين متخفي مو عارفين
سألنا عليهو نص الليل
قمر دورين ..
ضحك قمر السماء الابيض
وشفنا سنونو تلمع زين
ما ردالنا .. !!!
ضاحك للنجيمات البتضْوي يقين
سألنا عليهو نهر النيل وماء توتيل
وكل وديانا والخلجان والرافدين
نزل موج البحر لي تحت
وتحت التّحت ... للقاعين
طلب سمك البحار مُهله
وقال إن شاء الله بس سنتين
لأنو الكنز يبدو ثمين
سألنا عليهو حر الصيف
وناس عطشانه وارده القيف
ومطره غزيره صابّه هتين
سألنا عليهو غابه كبيره من أبنوس
تبلديةً تفرّ الضحكه
ماها عبوس ..!!
سألنا عليهو صوت طوريه
صوت جراري ..
صوت مردوم....
وصوت طمباري لحن حزين
قال آناس ..في شان الكنز ..
أحفروه التراب لمن يقول آمين
سألنا عليهو كل الفقراء والصالحين
أهل والذكر والنوبات والتمكين
قالو أصبروا ..
كان الخيره تصدق يبين
سألنا عليهو ناساً في الدروب طاشين
قالو أخير تسيبو وما تكوسو دحين
وكنزنا زاتو ما معروف...
وما معروف تحت أرضين
من الماس النفيس وثمين
دا قول وحدين
من التبر المحلى لجين ...
دا راي عارفين
عليكم الله يا الزينين ..!!
أوصيكم وصية ً ...
عهد وذمه ودين
تشوفوا الكنز تمرقوه
وما تخلوه يبقى دفين
ويوم ما إنتو تلقوه تحفظوه
من الحساد ومن العين
ودعتكم الله يا الطيبين
أبقوا على الكنِزْ ألفين