اللّزيزة.............

ELMOIZ ELHAJ ELNOUR الأربعاء سبتمبر 07, 2011 10:20 am

قالو زهجانه واظنك
ما عرفتي سؤالي عنك
يا اللِذّيْذَه الكلي جنك
عايز اكون انا ابقى منك
اي حاجه قريبه منك

تبقي طربيزه ابقى كرسي
تبقي راكب ابقى تكسي
بيكي اسافر لام دقرسي
وتبقي حافله ابقى بوكسي
وياسلام لو ابقى ببسي
تشربيني
تقرطعيني
تدفقيني
وما مهم
هي قرطعيني
بس مهم شوفت عيونك ابقى منك اي حاجة قريبه منك

تبقي وردي ابقى ترباس
تبقي سانتو ابقى كدباس
تبقي بنكي ابقى حراس
تبقي برعي ابقى عباس
تبقي باب ابقى ترباس
ابقى غرقان تبقي رفاس
رفسيني
وفتشيني
وغرقيني
وفنجطيني
وماهم
هي رفسيني
بس مهم شوفت عيونك وابقى اي حاجه قريبه منك

تبقي فالق ابقى مفلوق
تبقي كسره ابقى طايوق
تبقي منفوخ ابقى مطفوق
تبقي ويكه ابقى لايوق
تبقي شناق ابقى مشنوق
تبقي حراق ابقى محروق
وياسلام لو تبقي خازوق
مقلبيني
وزهجيني
وعكريني
ومامهم
هي مقلبيني
بس مهم شوفت عيونك وابقى اي حاجه قريبه منك

تبقي حيطه ابقى طوبه
تبقي روسيا ابقى كوبا
تبقي جمباظ ابقى هوبا
تبقي غنمايه ابقى لوبه
تبقي فاطمه ابقى زوبه
ابقى راس هي تبقي قوبه
ألميني
وعوريني
وبشتنيني
وزهجيني
ومامهم
هي عوريني
بس مهم شوفت عيونك وابقى اي حاجه قريبه منك

تبقي سكر ابقى ضبان
تبقي بوليس ابقى بمبان
تبقي كبده ابقى مصران
تبقي شيته ابقى طرزان
ابقى حفله وتبقي سكران
فرتقيني
وجهجهيني
وبهدليني
ومامهم
هي فرتقيني
بس مهم شوفت عيونك وابقى اي حاجه قريبه منك

قالو زعلانه واظنك
قالو قرفانه واظنك
ماكي عارفه سؤالي عنك
يا اللذيذة الكلي جنك
عايز اكون انا ابقى منك اي حاجه قريبه منك
اي حاجه قريبه منك