نبذة تعريفية عن مدينة امبرمبيطة

رحلة جميلة شديد والله

اهلا بالباشا والله ليكم وحشة . مشاغل الدنيا حرمتنى منكم
لكن دائما انتم فى البال والخاطر . الا بدور اسالك من الاخوة ابو عصام خالد بكر والسيلة والصادق جبارة و
الاخت هبة وبقية العقد الفريد شايفم برضو مسجلين غياب طويل عساهم كويسين وطيبين .

مرحب حباب ود العميد تعال داخل افتقدناك كثيرا نورة الدار حبابك وما تطول الغيبة

السلام عليكم ورحمة الله وتعالى وبركاته اخوتى واحبابى رواد منتدى القوز اخباركم واحوالكم فى خلال
الايام الطويييييييييييييييييلة التى غبناها عنكم عساكم كويسين والله مشتاق كتير
جدا جدا وربنا يمد حبل الوصال بيننا .

سلامات اخوتى واخواتى رواد المنتدى بالداخل والخارج
حظكم يا ناس الداخل السنة مستمتعين برمضان والجو الجميل ده براكم والله انحن هنا الحر والسخانة معذبانا عذاب التقول مات فيها حدادى على قول المثل . وبعدين صراحة فقدت اكلات رمضان الشعبية الجميلة ديك وخاصة الكردفانية مع الخريف والامطار السنة دى الكرتونة ما جاتنى . واول حاجة محتاجة بشدة ام جنقر يا سلام لو كبو فوكة حبة روب وتانى شئ شربات القنقليز والعرديب وبليلة اللوبيا وملاح الكمبو (الشرورو) افهموها بقى كتابته صعبة للنطق فقط والله الغربة حارة الا انقسمت لينا نسوى شنو ؟ربنا يعينا عليها .واهم حاجة المديدة الدافية ولمة الناس فى الضرا يا سلام يا كردفان . ونواصل

انت فى قلب الرحلة واستعدى كويس لانه بكرة انشاء الله سوف
نعرفكم على اهم المعالم فى امبرمبيطة ومن ثم ناخد استراحة وقيلولة
فى جناين الجميزاية جنوبى امبرمبيطة. اشكرا كتيرا على المرور.

كانت اجمل رحلة مرورا بجارة الوادي ودخولا بالدبيبة ثم هبيلا هذه هي السياحة بالمعني الحقيقي بس خبرنا النجهز حالنا للرحلة القادمة
تحياتي...

وقفنا فى المرحلة الفاتت عند قرية كدبر وهى قرية جميلة وادعة تربتها صخرية مبسطة حمراء اللون .طيب نمشى فى طريقنا الى جارة الوادى آهه شايفين بدت تتشاف لينا ملامح هدفنا من بعيد ايوة شايفين الشئ الطويل ده البشبه شجر البلح ده دى شجرة اسمها شجرة الدليب وهى توجد على طرفي خور البطحة وانا قاعد اسميها المنقذة للحياة لما لها من فوائد غذائية كتيرة اولا يمكن اكل ثمارها ومن ثم دفن الثمار لكى ينتج لينا الهالوك ذاكم الجذر اللذيذ وايضا بطلع منها ام كمبش ,وسبب التسمية لانها انقذت ناس كثر من الموت ابان فترة الجفاف الاول والتانى فى العام 1991م , طبعا يا اخوان كده نكون داخلين على الدبيبة من الناحية الغربية اول شئ يقابلنا من المعالم الواضحة مستشفى امبرمبيطة ونقطة الشرطة والمدرسة الثانوية اولاد ومن بعدهم السوق وبه الجامع العتيق وادارية امبرمبيطة ونادى شباب امبرمبيطة (اجتماعى ثقافى رياضى ). وبعد ده نرتاح شوية فى بيتنا وبكرة الشباب محضرين لينا رحلة جملية الى المعالم السياحية داخل المدينة ومنطقة البزام والحجير الذى حلف فيه الشيطان وسوف ترون اثر اصابعه الستة
ومحلج امبرمبيطة والباقى مفاجأة. ونواصل باذن الله ............

اليوم احبيتى رواد منتدى القوز سوف اخذكم معى فى رحلة جملية الى مدينتى جارة الوادى امبرمبيطة الجاهز يركب معانا عربيتنا كبيرة بتشيل اكبر عدد ممكن والخير واجد مافى مشكلة فقط ادونى من زمنكم شوية .
نبدأ مشوارنا من الدبيبات عاصمة القوز طبعا توجد تلاتة طرق يمكن ان تؤدى الى امبرمبيطة اولها واسهلها عن الدلنج , وقولت تيت مرقتنا من الدبيبات جنوبا متجهين صوب عروس الجبال بنلاقى فى طريقنا قرية طيبة بلد صديقى عبدالرحمن العالم ثم السنجكاية وبعدها الضليمة طبعا ده الاسم القديم وما علينا بالجديد لانه تاريخا اتحفظت كده , وبعدها بشوية ندخل على الدلنج الجملية وانحن طالعين منها جنوبا سوف ننحرف يسارا سالكين الطريق البودى لهبيلا وقالو (الما عندو قبيلة يمشى هبيلا ) وهذه اى المقولة اعتقد قيلت لكثرة تماذج الناس بمدينة هبيلا حتى ذابت بينهم القبلية واصبحوا ينتسبون الى المدينة هبيلا ,طبعا يا اخوانى كده نكون داخلين على بداية حدود المحلية وبعد شوية سوف تطالعنا بداية المشاريع الزراعية آهه شايفين الجبل داك الواقف قدامنا عديل ده جبل هبيلا ومن اهم معالمها مبنى المحلج وحامية الجيش والسوق ومستشفى هبيلا وهو تقريبا بنفس مواصفات مستشفى الدبيبات لان المقاول واحد كما هو الممول ايضا واحد وزيد عليهم متشفى امبرمبيطة سوف ترونهم جميعا انشاء الله فى رحلتنا هذه اكيد سوف نتوقف قليلا نفطر ونشرب القهوة والشاى وبعدها نواصل مشوارنا .طيب وبعد هبيلا المدينة سوف نمر بهبيلا المزرعة وبعدها بقرية كوكاية وبعدها قرية الفار ومن ثم مدينة دلامى وهى تعتبر عاصمة قبيلة النوبة الكواليب ومن اشهر رموزها العم حماد ابوصدر عضو اول برلمان سودانى ومن الذين صوتوا لاستقلال السودان ومنهم ايضا النور كبسور ودكتور كبشور كوكو واللواء م محمد مركزو كوكو واللواء محمد جرهام ودلامى هى عاصمة المحلية كما هى مركز قديم من زمن الانجليز وبها سوق يوم الاربعاء يعمه جمع غفير لما به من قوة شرائية كبيرة ووفرة فى المحصولات الزراعية والغابية والثروة الحيوانية . وبعدها نواصل مشوارنا متجهين شرقا سوف نعبر بين جبلين اعملوا حسابكم المنطقة هنا خطرة جدا يمكن نلقى لينا كمين ولا كده زمن التمرد الاول كان دائما ما يكمن الخوارج فيها , وبعدها نصل قرية كدبروهى بلد يعقوب الفيل وزير الاستثمار فى اول حكومة بعد اتفاقية نيفاشا وكده يكون باقى لينا رويس قميلاية عشان ندخل امبرمبيطة نقيف هنا ونواصل باذن الله .......

الاخوة الاحباب ابو عصام وودجبارة والعزيرة هبة
مشكورين على المرور والتعليقات الجملية ,هى امبرمبيطة جارت الوادى سحرتنا بجمالهاواخذت بالبابنا لا نستطيع ان نبعد عنها كثيرا لكن تصاريف القدر العجيبة وتدابير الحياة وقسوتها هى من ابعدتنا عنها .عندنا شكيرية دائما نقولها نحن ناس امبرمبيطة وهى (ام عشر اهله ما كشر كن جيتا فى يومين توالف وعلى تلاتة تحالف).
ولكم فائق حبى وتقديرى

في الحقيقة هذا ما اردته بالضبط معرفة اسماء القري ولا تؤاخزني اخي ودالعميد ولكن هذه اول مرة اسمع بالدبيبة ومن خلال حديثك عنها فلاشك بجمالها وطيبة اهلها ..ولك جزيل الشكر .
تحياتي...

مشكور ودالعميد واعتقد ان الدبيبة جميلة من واقع التعريف وانت تحلو لك تسميه الدبيبة مش كدا؟ بعدين التمرد سيئ جدا إلا انه اتاح لابناءمنطقتك ان يبحروا فيها براهم دا فضل وتمنيات ان يدوم عليكم السلام والامن والطمأنينة والا تعود لغة الذخيرة مرة مدي الحياة حتي تنعموا بالاستقرار فوالله هذه دعوات صادقة من صميم قلبي

السلام عليكم يا شباب !!
يا سلام يا ود العميد على مجهودك الرائع حيث وضعتنا في قلب ام برمبيطة و كأننا تجولنا بها الله يدوم السلام و المحبة
تقبل مروري !!

احبابى رواد منتدى الدبيبات اسمحوا لى ان اعطيكم نبذة قصيرة عن مدينتى يمكن فى بعض الناس ما عندهم خلفية عنها.
اولا سميت امبرمبيطة بهذا الاسم نسبة لكثرة وجود نبتة او( قشة)تنمو فى فترة الخريف يقال لها امبرامبيط تقوم على طرفى خور امبرمبيطة من هنا اتى الاسم .تقع الدبيبة وهو الاسم التانى ليها فى الجزء الغربى من محلية الرشاد وهى وحدة ادارية تحدها من الشرق محلية الرشاد ومن الجنوب محلية هيبان ومن الغرب محلية دلامى ومن الشمال ادارية جبل الدائر .ومن الشمال الشرقى ادارية ابو كرشولا, وهى تضم مجموعة من القرى اشهرها الفيض ام عبدالله وخور الدليب وام بير وهى مسقط راس عبد العزيز الحلو وابو الحسن والمنصور المقلم وتومة ومن الشمال قرية رضينا وهى مشهورة بالمشاريع الزراعية.اهم المعالم الموجودة بامبرمبيطة الوحدة الادارية والمحلج وهو تابع لمؤسسة جبال النوبة المنحلة وايضا مشتل الحكومة وهو من زمن الانجليز وبه اشجار المهوقنى والبان والنيم وايضا من اهم المعالم نبع البزام وهو مزارلكل اهل البلد وخاصة العرسان واولاد الطهور.كما يوجد بها عدد اربعة مدارس اساس 2بنين و2بنات وعدد مدرسة ثانوية اولاد وثانوية بنات ومستشفى كبير زى حقكم بتاع الدبيبات وبناه نفس الممول,ومصادر المياه تشرب المدينة من واحد دونكى وعدد كبير من المدخات اليدوية والابار السطحية, اهم المجموعات السكانية الحوازمة الحلفا وبها نظارتهم تانيا النوبة الكواليب والليرا, ثالثا العياتقة , رابعا مجموعات الهوسة والفلاتة والبرقو والبرنو واسر من المساليت.الحرفة الاساسية هى الزراعة التقليدية والالية وتتبع لادارية امبرمبيطة مشاريع رضينا وملبك وام لوبيا وكانت تسمى بها الادارية ومشاريع كرندل والازرق, والحرفة التانية الرعى حيث توجد بها اعداد كبيرة جدا من الابقار والغنم بشقيه الضان والماعز والثالثة التجارة وخاصة خلال فترة التمرد الاول حيث خرج كل التجار الجلابة مما اتاح الفرصة لاواد البلد ان يدخلوا فى هذا المجال ويوجد بها سوق كبير فى يوم الخميسحيث يعمه اعداد كبيرة من التجار ياتوا من الروابة والرهد والابيض خاصة فى فترة ما بعد الحصاد وآخر صغير محلى يوم الاثنيين.يعتبر مجتمع الدبيبة مجتمع متماسك جدا والعلاقات الاجتماعية طيبة جدا بين كل مكونات النسيج الاجتماعى ويعنى عادى جدا لو جيت السوق وسالت من اى زول سوف تجد من طرف من يدل عليه.