أم ضي والزمن المضلم

رد الله غربتك ياعزيز جد انت اكتر من وطني والله كون تحس بدواخلو وانت خارجو وحقيقة وطنا جرح نازف نازف تمنياتي يضمد الله جراحو نحن حنغرق في دماء نزيفو طالما إنو وطنا ولا وجود لنا دون وطن وياشباب
ابقوا عشرة علي ترابوا البضيع مابجيكم تاني
ابقوا اخوان في ضراكم عنقريب واحد بشيلكم واشتقنا ليك ياحبيب اكتر من الوطن لان من ينشد الوطن هو الوطن نفسو
ودي

الله يسقين من ماء الجنه !!! ويجمعك بمن تحب !!
تقبل مروري !!

الاعزاء خالد وسليمان ..
حبابكم الف..دايماً بقول انو اهلنا ديل من اطيب خلق الله..شوف حبابك الف دي كيف..تأطير قوي جداً لعلائق القربي الوجدانية العميقة..يعني بدل حبابك واحدة مسونها الف..ودا انعكاس صادق لدواخلهم الرحبة المترعة بالاخلاق السمحة والخلق النبيل..مرات كتيرة بقعد واتأمل في كتير من مفرداتنا البنقولها في الترحاب والوداع وفي كل اوجه حياتنا العادية ومدي ارتباطها بالمكون الذاتي للناس ,بجد انها بتعبر بصدق شديد الحال الداخلي للزول..
والله يا خالد بتزكر لي يوم الليلة الموية الشربناها عندك هناك جنوب ام سعدة..كنا عطشانين عطش..عطشانين عطش ..ونحن في زمة الخلا بنفتش علي بقر خالي الطيب المهدي..الموية العندنا كملت تب..كمان انحنا شربنا مويتك تب..ومشيتنا منك لقينا البقر..الفرحة بقت اتنين فرحة الرويان وفرحة الجمعان..الله يجمعنا في ساعة خير..شكرا كتير علي السؤال..
الحي بعود الدار

طمنتنا يا سليمان الله يطمنك !! لان الحقيقة الاخ التوم نبراس فلما يكون نوره قصير يقلق الاصدقاء عموما نحن بإنتظارك يا ود الفضل !!

الاخ خالد
كل سنة وانت طيب والله ياخالد نحن متشوقين لقراءة ماسيكتبه التوم علي الفضل لانه يتميز بلونية خاصة من الشعر والمقالات ولكنه الان مشغول بالدراسة والتحصيل العلمي وهو بخير لقد اتصل علي الاسبوع الماضي وتحدث معي ساعة كاملة
سيعود الي المنتدي قريبا وهو يقرا كل مايكتب بالمنتدى ومتابع .

يا جماعه اللي عارف اخبار التوم علي الفضل يوافينا بها المنتدى اشتاق الى إبداعات الفنان ود الفضل و عسى المانع خير يا التوم ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

صباح الخير على الجميع !!!
يا ود الفضل كما قلت أنت سابقا الوطن مجروح و ينزف ونحن في نشوة هوانا الان الوطن طلع من العناية المركزه و تم بتر الساقين و بقى من ذوي الاحتياجات الخاصه بعد ما فقد ساقيه و لكن للاسف الدكتور إكتشف إن فيه سيرطان اخر ومانخشاه الان إن يتم بتر جزء ثاني منه !!! لك التحية يا مبدع !!

الله يرد غربتك يا ود الفضل !! لكن عليك الله أسع مابتشم ريحة الدعاش

الصديق خالد ..اول حاجة والله انا في غاية السعادة والفرح ان نلتقي من بعد طول غياب..تاني حاجة " ات طيّب" ، دايماَ بقول وما زلت ان اهلنا في القوز هم احنّ واطيب خلق الله ،وعبارة ات طيّب تكاد لا تفارق اي لسان حينما نلتقي وهي لسان حال القلوب المليانة حنية وزيادة،ودايماً ما تتبعها "والله مشتاقين" للتأكيد..ياخي والله مشتاقين..يا سلاااااااااااااام ياخي..
خالد اخوي جيتاً جيت ومرحب بيك هنا ،والمكان عامر ومزدهي بالاخوان ،يحملون هم الناس والتراب ،ويتطلعون لمستقبل باهر للبلد.
ومشكور علي المرور،وسعيد جداً باللقيا علي قول صديقي طارق موسي داؤود ،شوف يا خالد حتي الكلمات لها ارتباطات بالاشخاص ودا اجمل ما تعلمناه من حياة القوز..
انا الان في امريكا،اسكن في ولاية منيسوتا يتاورني الحنين بكرةً وأصيلا ،للناس والتراب ،ولكل مكونات البيئة.
من ضليل قطية مارق لي سموم حر الهواجر
شلتْ زادي هموم قليبي ودفقة من دمعة المحاجر
"ام عزة " أمي ودعتك الله ماشي منك و ماني داير
عيشة من حضنك تباعد ولي جراحي دوام تتاور
إلا هى الدنيا اب تفرّق يوم تلاقي، ويوم تهاجر
ولك مودتي واتمني ان يخرج الوطن من العناية المكثفة سليماَ معافى لا فيه طق او شق..نصيح جدي.

صح لسانك يا ود الفضل , أنا ماقلت ليكم يا ناس المنتدي الزول دا شاعر
الوطن مجروح و ينزف و نحن في زحمة هوانا و بكره يبقي الجرح فينا و يا عذاب نشوة هوانا
عليكم الله البيت دا ما مفروض يدرس في المدارس ؟؟؟ بكره يبقى الجرح فينا .. وين بكره هو من البارح أتجرحنا كلنا و الوطن الان في العناية المركزه و لا ندري يطلع من الانعاش ولا الدكتور بيقول لينا جهزو كفنكو يا أهل الميت !! الله يستر يا ود الفضل ! لك التحيه من هذا المنبر و أنت وينك ياخ والله سائلين عنك .

ام ضي خبارك , ساهية زي الرايحة منك
إبرة في قش التواكي..
ساكتة مالك ما بتردي
ولا خايفة الريح تبوح اسرار بكاكي..
خاته في الخدين يديكي
ودمعة من عينيك ترقرق راسمة احزان التباكي..
ما بين عيونك والارض
حزمة من وجع المآسي تربطي فيها بدون رضاكي..
في زمن اشتر مغبش
بعثر الفكرة الجميلة خت امالك قفاكي..
رص فوق خاطرك هواجس
وفي الدريب شيد متارس
شان تعيق اصرار خطاكي..
ام ضي خبارك ما بتردي
كلميني عليكي الله وطيبي الاحساس عساكي..
اني اغبش زي غباشك
قمت قدامي الطواري..
عشان اتيرب حب بلادي
فوق جباريك الضهاري..
في التباريب ليلي واقف
ومشلعيب وكت العصاري..
طاقي عكازي المضبب
ماشي مردوم او جراري..
ويا حلاتن ريل بلدنا
وكت يقوقن كالقماري..
تشيلني هاشمية وتدغدغ
حس مشاعري وجوف غراري..
ويصحى فيني احساس ملبد
بين غيوم سحر العصاري..
اني انسان في دواخلي
تعيش بلومه مع الخداري..
ام ضي ابت تفتح خشيمه
محنتني وماني داري..
شن اقولو معاها تاني
ولي رؤاها كمان اباري..
ولما شافت هولي فيها
فجت الدمعة ابتسامه..
زي بريق القبلي ضوا
زال عتامات الغمامه..
وزي دعاشات نسمة رافلة
فوق مساحات الوسامه..
رفعت رويسه علي سحابآ
ذاده تاني علي سماحه..
قلت قولي عليكي الله
عشان يزول اثر المناحه..
واعرف اني عرفت انك
احتواكي ضليل وراحه..
ولما قالت لي كلامه
بكيت وما خليت مساحه..
الوطن مجروح وينزف)
ونحن في زحمة هوانا..
بكرة يبقي الجرح فينا
ويا عذاب نشوة هوانا )..
وفجأة مني ام ضي غابت
الا صوته ملك اذاني..
ياحبيب ما اظنو تاني
يا حبيب ما اظن تراني..
ابقي عشرة علي ترابك
البضيع ما بجيكا تاني..
وابقوا اخوان في ضراكم
الكتال جفوة معاني..
عنقريب واحد بشيلكم
لو نفوسكم صاح تداني..
ياحبيب ما اظنو تاني
ياحبيب ما اظن تراني..
اذكت ام فيني حسرة
وسر غيابه دهش جناني..