مساديركردفانية3

شعر / محمد زين العابدين أبو جديري


غَرَقْ جُوَّاكْ


أنا الواقِفْ محَكِّرْ
في رِمِشْ عينيكِ يا عَزَّه
دَوَامْ مُشتَاقْ ومُسْتنيكْ
ومِنْ كُلّ الجِهاتْ السَّمْحَه
في داخلِكْ بحاوِلْ اجِيكْ
بَفَكِّرْ في قُدُرْةَ الخَالِقْ السَّوَاكْ
وأدَاكْ السَّمَاحْ الفِيكْ
قِلِيبي الدِّيمه فِيكْ هَيْمَانْ
بخَافُو يتُوهْ يفُوتْ مِني ..
عَشَانْ دَرْبِكْ هُو رَاحْ مِني
ومِنْ زَمَناً بَعِيدْ !!
حَاسِّيكِي في جُوَايْ
بفَتِّشْ ليكي ما لاقِيكْ
****
عَلِيكِ المَوْلَى ما تْغَمْضِي
بخَاف الوَقْعَه مِنْ رِمْشِكْ
أقَعْ خَارْجَ الحُدُودْ بَرَّه
وحَلَفْتَ يمِينْ !!!
أعِيدْ الكَرَّه والكَرَّه
سماحاً والله مَالِكني ..
وَجَعْ جُوَايَ هَالِكني ..
أجِيبْ سِيرْة الرُّجُوعْ تَاني
وكُلَّ النَّاس !!!
عَلِيكْ المولى ما تَرْجَعْ
عَلِيكْ المولى ما تَرْجَعْ
شُوفْ الوَقْعَه كانَتْ كيف !!
بحاوِلْ جَنبْ حُدُودِكْ أقِيفْ
أعايِنْ مِنْ بعِيدْ رِمْشِكْ
أخُشْ الخنْدَقَ الجُوَّاكْ
عشَانْ أتْوَارَى ..
مِنْ نِيرَانْ لهِيبْ لحْظِكْ
أشُوفْ الخُضْرَه مِنْ حَوْلِكْ
تكُوني الوَاحَه !!!
شَكْلَ الخُضْرَه يَبْقَى القيف
عَشَانْ القيف رِمِشْ عينيكْ
بقيف عِنْدِكْ !!!
واشُوفْ بحْرِكْ غَرِيقْ جُوَايْ
وقاعِكْ فِيني زَغْرُودَه
مَوَشَّحه بالعَدِيلْ والزين
مُصَنْدَلَه بالغُنَا الدُّوبَايْ
وبَسْمِكْ جَايِّ شَهْقَةْ رُوحْ
وصَمْتِكْ فِيني كَانْ رُورَايْ
بحَاوِل أجِيكْ !!
بحَاوِل أجِيكْ !