الآلات الايقاعية نحاس، الدلوكة، طمبور

هبة عووووووووووووووووووووك وينك روّحت وين شجعتينا على البوست الرائع ده وعملتى نايمة اظهرى.

السلام عليكو ياالزينين الاستاذ سليمان والعضو الذهبي وذات الخضاب نعلكو مبسوطين وكلامكو عجبني وجيتكو اتونس شية وطالمان انو الكلام عن الدلوكة وتحديدا الأخيدر دايراقول(الاخدر الليموني خلي قلبي سير طاحونة الحبيب دا مابخونة الدبيبات سكونا الحبيب دا) اتمني شرح وافي للمفردات والتعابير الدارجية لكم ودي ونلتقي

الاخت هبة
اولا اعتزر عن الغياب في الفترة الفائته حقيقة انا جابني حس الدلوكة وجيت شايل عصايتي ام قرش وبارم سكيني في ضراعي عشان نخش الصف طوالي مع ناس الخال المرحوم عبد الله(المشترك) والكسرو وحمزة الصحراوي وابراهيم موسا وبعد دخلت الحفلة لقيت سعيدة بت جبرين والدكيمة واخريات وكانت الاغنية عن البطل محمد نور سعد (مشيت القبه قلت نزور لقيت المنقة مع الزهور اصلو ما معقول الشايل الجايزة محمد نور)
المقطع دا قالنوا المسبعاويات في السبعينات عندما استبسل الخال محمد نور سعد والقصص الكثيرة التي رواها كل من شاهده في تلك المعركة
وانا اتفق معك الاخت هبة فيما كتبتيه عن الة الدلوكة ولكن حسب البحوث التي قمت بها في مجال التراث وجدت ان ناس الشمال الدلوكة يعزفها الرجال نذكر احدي تلك القبائل الجعليين ومنهم الفنان محجوب كبوشية والقلع واخرون
واتمني ان تحضري حفلة في شندي او الجيلي بحكم انك الان بالكدرو لتتعرفي علي تراث تلك القبائل وترى الدلوكة يعزفها الرجال
ومن الايقاعات التي تعزف بالدلوكة ( الربة، السيرة، ام كوع، التم تم ،الريقي‘الكنق واقلبها ايقاعات ثلاثية ورباعية
تختلف الدلوكة عن النكارة بانها تاخذ شكل نص كروي مفتوح من الجانب الاخر
وتصنع من الخزف كما ذكرتي ويستخدم فيها جلد الاغنام
اما النقارة تنحت من سوق الاشجار شكل بيضاوي او مخروط ناقص وشد الجلد فيها باتجاهين ويستخدم في النقارة جلد الابقار
تستخدم النقارة كوسيلة اعلام في الرقص ، في الفزع وفي الاكراه عند ناس الجنوب واستخدامات كثيرة
تحياتي عبرك الي العضو الذهبي ود العميد ، وين ود العمدة

سلامات استاذة هبة الاخبار . كويس انك جيتينى فى نفس الاتجاه كما ذكرتى اختى العزيزة الدلوكة اداة حماسية جدا وما من احد يسمع حسها الا وتحرك فيه شيئا , نحن فى كردفان تميزنا ايقاع الربة الجميل وخاصة فى القوز (الربة الربة حيا انا الثانوية خور طقت حيا انا) وبرضو( الاخضر الليمونى حلفتك بعيونى تعال ,تعال نتمو الريدة تعال) وهكذا ابيات بسيطة ولحنها جميل . يا ريد تواصلى وتبحثى لينا عن المكنون من اغنيات الربة واكيد المدير حيساعدك كتير .

وأهم ما يميز هذه الالآت الايقاعية هو "الثراء " خذ الدلوكة كمثال، فهي تهز وجدان كل سوداني، وعموماً فإن الآلات الايقاعية السودانية متداخلة في عملها، نجد الدلوكة "في دق الريحة " هذا التداخل الايقاعي يعطي موسيقانا تميزاً واضح "ايقاع سيمفوني ".
والدلوكة موجودة في كل مناطق السودان في الشمال والوسط والشرق وهي الدلوكة المعروفة. أما في الشرق والجنوب فيطلق عليها النقارة، والنقارة قريبة من الدلوكة وتختلف في كونها مصنوعة من الخشب بخلاف الدلوكة التي تُصنع من الفخار.
والشعب السوداني يحب التقليد وينبهر بكل ماهو غربي، لكن الواقع الوجداني للشعب السوداني يشير إلى ان الآلات الايقاعية الشعبية لها تأثير واضح في نفوس المستمعين، اذا عزفنا دلوكة – مثلا – وكمنجة نجد تأثير الدلوكة اكبر على وجدان المتلقي السوداني.
الدلوكة في الأصل آلة نسوية بحتة نجدها تستخدم في العديد من الطقوس الشعبية المرتبطة بالمرأة مثل "دق الريحة "، "الحنة " والجرتق، طقوس السيرة المختلفة،وارتبطت الدلوكة "بالتم تم "، والدلوكة آلة لصيقة جدا ً بالمرأة، "مافي بيت سوداني ما دقّت فيهو الدلوكة" ونسبة لارتباط المرأة الاجتماعي في الأفراح والاتراح فقد كانت الدلوكة هي الآلة التي تعّبر عن الاحاسيس السودانية.
من اشهر عازفات الدلوكة في السودان
كثيرات منهن حواء الطقطاقة، وحميراء وحواء بنزين، وقسمة ونصرة وسمية حسين ، واسمع الآن عن إنصاف مدني وهاجر من خلال الصحف.
تحياتي....